Ба ҳамин тариқ Исломиддинро, раиси Хадамоти зиддинҳисории Тоҷикистон таъйин кард. Бо имзои худаш. Аммо Умед “дар мувофақа” бо Эмомалӣ Раҳмонов аз тарафи Юсуф Раҳмон, Прокурори генералии Тоҷикистон, охирин қудои Эмомалӣ Раҳмонов (Фарзона, духтари кенҷагии Раҳмонов аруси Сафар, бачаи Юсуф Раҳмон шуд) прокурори Ҳисор, яке аз калонтарин ноҳияҳои Тоҷикистон таъин гардид. Ин ҳарду чанде пештар аз мақомҳо кор озод шуда буданд.

 Исломиддин то вазифаи наваш дар мақоми раиси ноҳияи Данғара, зодгоҳи Эмомалӣ Раҳмонов  ва Умед дар курсии прокурори ноҳияи Исмоили Сомонии пойтахт кор мекарданд. Маълум буд, ки Раҳмонов, ин диктатори худкома, ки ҳукуматашро аз хешу табор, фарзандону домодҳо, қудоҳо ва ҳаммаҳалҳояш ташкил кардааст, ин ду нафарро аз дастархони пурнозу неъмат зиёд дур нигоҳ намедошт ва дар мақомҳои нав таъйин мекард. Ва ҳамин тавр ҳам шуд. Корди ин нафарҳо бояд то замоне, ки амакашон раиси давлат аст, болои равған бошад. Ва, амалан ин ҳарду аз ҳар лиҳоз, ҳам аз лиҳози карйера ва ҳам аз лиҳози онки доираи мансабу мақомҳои навбатиашон калонтару болотар ва муҳимтар аз ҳама серпултар аст, “гуфти гапо” “повишенний” рафтанд.

Хадамоти зиддиинҳисорӣ дар фаъолияти ҳамаи сохтор ва ниҳодҳои давлатӣ ҳақи мудохала кардан дорад ва тамоми молу маҳсулоти воридотиву содирӣ ва истеҳсолӣ ва нарху навои хадамоти коммуналӣ бо вай мувофақа карда мешавад. Исломиддин аз музофот ба шаҳр омад ва вазир шуд. Албатта, ин як лутфу марҳамат ва инъоми бисёр ҳам гаронарзиш аст, ки танҳо ҷиянҳо ва он ҳам ҷиянҳо “любимчик” метавонанд сазовор бишаванд.

Нуктаи як каме мутафовит дар ҳасби ҳоли Исломиддин ин аст ки ӯ ё номи вай Исломиддин насабаш Хайриддин, на Нуриддин аст. Гап дарон аст ки Нуриддини тракторист дар паспорт Хайриддин ном дорад. Яъне ду нома. Аммо дар байни халқ ҳамчун Нуриддини тракторист машҳур аст. Ҳамон Нуриддине, ки ӯро худи Эмомалӣ Раҳмонов ба ҳангоми аввалин суханрониаш дар Иҷлосияи 16-и Хуҷанд дар ноябри соли 1992 бо як ифтихори баланд, гуфта буд, ки дар оила ва авлод “танҳо бародари трактористаш” ҳаст ва дигар каси дипломдор (!?) дар авлодаш надорад, дар тамоми кишвар машҳур карда буд. Он вақт ҳамагон ба Эмомалӣ Раҳмонов  каф кӯфта буданд, ки чи қадар “як бачаи деҳқон” аз бародари тракторчиаш бо ҳарорат суҳбат мекунад ва мегӯяд, ки ӯ тракторчӣ боқӣ хоҳад монд.

  Аммо Эмомалӣ Раҳмонов на танҳо ба зери қавлу амалаш дар сиёсат, масалан дар аҳди додааш бо мухолифин ва имзои Созишномаи умумии сулҳ зад, ҳамчунин бародари тракторчиаш-Нуриддинро аз  як “тракторчӣ амак хуррам”(суруд аз китоби хониш) ба як феодал-фермер, бизнесмен-миллиардер табдил кард. Марҳум Нуриддин, ки дар шиносномааш Хайриддин гузаштагӣ як каме дертар “дар зери қанат”, ва сояи бози давлати бародараш ба давлату сарвати ҳангуфт даст ёфт. Дигар “посредник”-ӣ ҳам мекард, барои онки ягон мансабу вазифаро бигираду бидиҳад,”кришават” ҳам мекард барои онки тиҷорати фалонӣ пешрав шавад ва ё “налог”-у “коррупсия” ғам надиҳад. Замину замони Данғара дар ихтиёри ӯ гузошта шуда буд. Чандин сурук моли майдаву фермаи чорвои шохдори калон, мурғпарварӣ, пахта ва мамнуъгоҳ, парки бузурги Лендкрузер, Мерседесу БМВву ҳоказоҳои дигар. Ҷангалҳои асосии ҳатто Сари Хосор ҳам дигар ба моли хусусии Нуриддин табдил шуда буд. Як нафар рафтаву тамошо кардаву ангушти ҳайрат газидааст, ки дар ин дараҳову куҳу пуштаҳои зебоманзар ба камияш ба 5 миллион доллар анвои гуногуни молҳои ваҳшӣ аз қабилу хирсу оҳуву хуки ёбоиву титаву тазарву товус аз як сӯ, дарахтони токи испониву пиставу бодоми туркиву эрониву садҳо рангу хели дигарро ин  тракторчӣ амак хуррам оварда дар ин дара шинонидаву парвариш кардаву сабз намудаву борвар кардааст. Афсус, ки дар айни авҷи истироҳату дамгирӣ ва осоиш аз замони пирӣ миқрози аҷал дар даст маликулмавт омаду риштаи ҷонашро барканд. (Аз руи гапҳо дар хонаи зани чорум ё панҷумаш дар яке аз деҳаҳои Рашт) Ҳама духтарҳову домодҳои курсинишину амалдор ва бачаҳои пеши Данғараи ин амаки тракторчӣ дар сугу мотам нишастанд. Вале амаки суперменашон, Пешвои Данғара, балки Девори Данғара гуфт, “ ҳиҷҷотона ғам набоша… ягонҷотона ғам набошад” ҳоло, ки ҳастам бхрену бучарен.

 Исломиддини Хайриддин Раҳмонов писари ҳамон Нуриддин, ки гуфтем ду нома аст ҳам Хайриддин (документалний) ва ҳам Нуриддин то январи соли ҷорӣ раиси ноҳияи Данғара буд. Ин бор низ амаки азизу мушфиқу меҳрубон, супермени Тоҷикистон нагузошт, ки руҳи Нуриддин-ҳамон танҳо як бародари тракторчии миллиардер ва феодали Данғара норозӣ бошад. Гирифту писари ӯро раиси Хадамоти зиддиинҳисорӣ таъйин кард.

Вақте Исломиддин раиси Данғара буд, ҳам трактори падарашро ҳифз мекард ва ҳам сарвату давлати ҷамъовардаи ӯро. Овардани Исломиддин ба Душанбе барои он аст ки кор дар марказро ҳам ёд бигирад. Вале Раҳмонов сари вай нақшаниятҳои дигар ҳам дорад. Исломиддинро дар оянда раиси вилояти Данғара монданӣ аст. Данғара ҳоло бамаротиб аз Кулоб зеботару ободтару ояндадортар шудааст. Дигар вилояти Кулоби собиқ барқарор ҳам, ки мешавад, номи Кулобро намегирад. Вилояти Данғара мешавад ва маркази маъмуриаш ҳам Данғара хоҳад буд. Исломиддини Хайриддин Раҳмон писари акаи тракторчии Эмомалӣ Раҳмонов ба эҳтимоли зиёд раиси ояндаи вилояти Данғара хоҳад шуд: “Ҷигарда… ҷигар….”

Инки Раҳмонов ҷиянҳояшро дар вазифаҳои пурмасъулияти давлатӣ мемонад, ягон гапи наве нест. Вале гоҳо ҷиянҳо бисёр ҳам сахт «подвадит» мекунанд. Масалан чанд соли пеш Фахриддин Сафаров, ҷияни хоҳариашро сардори шуъбаи милисаи Шаҳринав монд. Дуди мардуми Шаҳринав ба фалак печид. Ин кам буд, ки вақти табобат Қурбонбӣ дар бемористони ҳукуматӣ дар Медгородок аз коронавирус даргузашт. Ҷоиз аст ёдоварӣ кунем, ки падари Фахриддини ҷияни Эмомалӣ Раҳмонов Холмуъмин Сафаров, раиси Иттиҳодияи ҷангали Тоҷикистон дар соли 2012 дар маҳаллаи Автовокзали Душанбе як субҳе тирборон шуда ба ҳалокат расид. Он вақт гуфтанд,  ки Холмуъмин аз як пулдор 350 ҳазор доллар гирифта будааст, ки ба Эмомалӣ Раҳмонов, яъне додари арусаш медиҳаду раисӣ дар кони Шугновро гирифта медиҳад. Яъне посредникӣ карда “якчи нимчи” барои худаш ҳам кор мекард. Аммо Раҳмонов аз каси дигар пули калонтар гирифта кони Шугновро ба вай медиҳад. Ин нафарони пулдода пулашонро аз Холмуъмин руёнида наметавонанду дигар ӯро ба қатл мерасонанд. Хуллас, ин Раҳмонов, чуноне мову шумо медонем, ҳамин тавр тамоми вазифаву мансабҳои давлатиро мефурушад.

Ва, аммо ҳоло гапи мо сари Фахриддину Қурбонбӣ ҷиян ва хоҳари Эмомалӣ Раҳмонов меравад. Фахриддин, вазири тандурустиро зада ҷоғу даҳонашро мешиканад, ки модари ӯро аз коронавирус наҷот дода натавонист. Баъди ин ҳодиса, ки овозаву дарвоза шуд, Раҳмонов Фахриддинро аз кор снимат кард.

Вале, акнун биоем ба сари Умед Раҳмонов, ки аз соли 2015 то соли 2024 Прокурори ноҳияи Исмоили Сомонии пойтахт буд. Дар ин солҳо вай чи корномаҳо нишон дод ва чи қадар аз қонуншиканӣ ҷилавгирӣ кард, касе чизе намедонад. Вале барои хизматҳои шоёнаш амакаш медали хизмати шоиста ба Умедро ҳануз соли 2014 дода буд. Он замон вай дар системаи прокуратура ҳатто кор намекард.

Инро ҳам бигуем, ки нардбони карйера Исломиддинро фақат ба самти боло вале бо суръати гиперзвукавой ракета боло бурдааст. Исломиддин соли 2018 раиси Данғара шуда то 30 январи соли 2024 шаш сол дар ин мақом кор кард. Аммо ин “арбоби давлатӣ”, ки  40сола мебошад қабл аз Данғара дар Бонки миллӣ ва «Ориёнбонк» кор карда ва дар солҳои 2015 то 2018 муовини раиси «Амонатбонк» буд. Яъне ҳануз, ки 30 сол дошт муовини Амонатбонки ҷумҳурӣ шуда буд, ана инро ҷаҳиши кайҳонӣ мегуянд.

“Ҷигарда ҷигар…»

Ҳамин тавр Умед ҳам аз як мансаби кучаки вазорати адлия мустақим ба курсии прокурори ноҳияи Исмоили Сомонии пойтахт лангар андохт. Бале, «ҷигарда ҷигар..» Ҳамон вақти таъиноташ яъне 22майи соли 2015 расонаҳо, аз ҷумла «Азия плюс» навишта буд, ки «Умедҷони Нуриддин, писари бародари калонии Эмомалӣ Раҳмон – Нуриддин Раҳмонов пеш аз ин сардори Маркази ҷумҳуриявии экспертизаи судӣ ва криминалистии Вазорати адлияи Тоҷикистон буд. Вай моҳи августи соли гузашта медали хизмати шоиста гирифтааст». 

Аммо, яке аз ҷолибтарин тағйироти кадрӣ, баъд аз ҷаласаи Шурои амнияти Тоҷикистон, дар авоили соли ҷорӣ, ки Раҳмонов бо як иқдоми камсобиқа масъулони раддаи ду ва сеи мақомоти қудратӣ, аз ҷумла Шодӣ Ҳафиззода, сардори УБОП, маъруф ба 6-ой отдели ҷумҳуриро барканор кард, таъйини ин нафари бадномшуда ба мақоми роҳбари Дастгоҳи марказии ВКД аст. Ҳамон вақт яъне 19 январи соли ҷорӣ Хадамоти матбуоти Тоҷикистон гуфта буд, ки «сатҳи пасти касбӣ, ноуҳдабароӣ, ҳолатҳои коррупсионӣ, афзудани ҷиноятҳои экстремистиву террористӣ, қочоқи маводи мухаддир, даст задани баъзе кормандони мақомоти ҳифзи ҳуқуқ ба қочоқи маводи нашъаовар ва молу маҳсулот» дар ҷаласаи мазкур баррасӣ шуд ва президент барои  «бесалоҳиятӣ, ҷавобгӯ набудани сатҳи иҷрои қонунгузории замин, пешгирӣ ва мубориза бар зидди ҷиноятҳои террористиву экстремистӣ, қочоқи маводи мухаддир ва ҷиноятҳои коррупсионӣ»  онҳоро аз вазифаҳо барканор кард.

Дар шумори ҳамин гуна афсари олирутба, ки Шодӣ Ҳафиззода ҳам медарояд, аз кор барканор шуда буд. Аммо ҳоло ӯро дар мақомои болотар таъйин карданд, албатта, ки бо мувофақа ба Эмомалӣ Раҳмонов ин кор сурат мегирад, агарчи Шодӣ Ҳафиззода шавҳари ҷияни  Рамазон Раҳимзодаи Ҷеки Чан бошад ҳам, ҳатман Раҳмонов розигӣ медиҳад. Яъне ин овардани хешу таборҳо ба мақомҳои давлатӣ бо таҳрик ва мувофақаи худи Раҳмонов сурат мегирад,  чунки худаш тамоми олу авлодашро дар масабҳои давлатӣ шинонидааст. Аммо як раҳ, ҳатто як раҳ аз Рамазон Раҳимзода суол намепурсад, ки ман ин Шодӣ Ҳафиззодаро аз кор сур кардам,ту чаро меоварӣ?

Бинобар баъзе маълумотҳо Шодӣ Ҳафиззода тавассути Озода Раҳмонова ба худи Эмомалӣ Раҳмонов барои ин мақом 1 миллион доллар додааст. Яъне, ин гапҳо, ки милисаву прокурору амниятиҳоро Раҳмонов аз кор ронд як дуруғи навбатии вай буд ва инро мо борҳо дидему мушоҳида кардему бовар дорем, ки ин ҳама демагогия, мардумфиребие беш нест.

Вале, барои як каме ошноӣ пайдо кардан бо Умедҷони Раҳмонов, ҳамакнун прокурори Ҳисор як иқтибосеро аз сомонаи “Бомдод” пешкашатон менамоем:

“Бино ба иттилои як манбаи огоҳи пойгоҳи хабарии “Бомдод”, Рустами Эмомалӣ, шаҳрдори Душанбе ва раиси Маҷлиси миллӣ, ки ҷараёни тафтиши парвандаи азобу уқубати Мадина Мамадҷоноваро таҳти назорати шахсии худ гирифтааст, дар робита ба ин парванда писари амаки худаш — Раҳмон Умедҷони Нуриддинро низ ба назди худ даъват карда, барои нақши фаъолонааш дар пӯшондани ин парванда сахт ҷанг кардааст. Рустами Эмомалӣ ба Умедҷони Нуриддин, ки додситони ноҳияи Синои шаҳри Душанбест, гуфтааст, ки “шумо бо чунин амалҳоятон обрӯи оилаи моро ба замин мезанед. Ман ин масъаларо ба падарам мерасонам, бигзор, чора бинад.” Манбаи “Бомдод” мегӯяд, ин суҳбати тунди Рустами Эмомалӣ бо Умедҷони Нуриддин қариб ду ҳафта пеш, қабл аз баррасии масъалаи Мадина Мамадҷонова дар ҷаласаи роҳбарони мақомоти ҳифзи ҳуқуқи Душанбе ва дар нишасти ҳукумати Тоҷикистон, ки рӯзҳои 1 ва 2 ноябр доир шуданд, сурат гирифтааст. Ҳам Рустами Эмомалӣ дар ҷаласаи аввал ва ҳам президент Эмомалӣ Раҳмон дар ҷаласаи ҳукумат талаб карданд, ки масъулони дар кӯшиши пӯшондани ин парванда саҳим аз мақомот ронда шаванд. Дар пайи ин дастурҳо, тавре қаблан хабар додем, Зафар Исмоилзода ҳамон рӯзи 2 ноябр аз мақоми сардори шуъбаи милисаи ноҳияи Сино барканор карда шуда, рӯзи 5 ноябр Сӯҳроб Салимзода, муовини аввали прокурори ин ноҳия низ тарки ин мансаб кард. Аммо Умедҷони Нуриддин, прокурори ин ноҳия дар мақомаш то ҳол боқӣ мондааст.»

Бале,Умедҷон ҳиҷ гоҳ, агар ҳатто ҷиноят содир карда бошад ҳам то вақте амакаш дар сари кор аст, «ч…ша ғам нест, зада меее—еее-гардад».

Инро ҳам бояд бигуем, ки ҳануз ду ё се соли қабл ӯро ба мақоми муовини Прокурори генералии Тоҷикистон шинонида буданд.

Ҳатто бархе аз расонаҳо ҳамчунин хабарро, ки Умдҷон   бо як ҷаҳиши бабрӣ ва як дави оҳуӣ аз курсии прокурори ноҳия мустақим ба курсии муовини аввали Прокурори генералӣ такя зад, чоп ҳам карда буданд. Вале, боз чизеро андеша карданд, ё чизе монеа шуд, ки ин фармони баимзорасида эълон нагардид. Ҳамон вақт як корманди коркуштаи Прокуратураи генералии Тоҷикистон дар зери ин хабар навишта буд, ки чунин парвози баландро дар ин Идора касе ёд надорад. Балки, баракс дар курсии муовини аввали Прокурори генералӣ, ки амалан тамоми умур дар ин ниҳоди муҳим ва асосии давлатро ӯ назорат мекунад ва аз донишу таҷрибаву малакаи кордонии ӯ фаъолияти прокуратура вобаста аст то ба имрӯз кадрҳо ва мутахассисҳои ботаҷриба ва солҳо дар прокуратура кор карда таъин мешуданд.

Дар ҳар сурат он вақт ин мақомро надоданд. Аммо,  дар оянда касе ин эҳтимолро наметавонад инкор  бикунад, ки муовин ва ё ҳатто Прокуруори генералии ояндаи Тоҷикистон бишавад.  Феълан ин мақоми генералӣ аст, ки Умед Раҳмон надорад. Ҳануз, вақте Умедро аз вазорати адлия ба прокуратури Исмоили Сомонӣ оварданд гуфта буданд, ки ин кор ба масал муаллимеро монад, ки як соли пеш коллеҷро тамом кардаву дар мактаб ҳоло коромуз-пионервожатий буд яку якбора сардори Управленияи маорифи вилоят таъйин шуд.

 Бо таъйиноти Умед дар мақоми прокурори Ҳисор бори дигар рушан шуд, ки Раҳмон чаро ин қадар зур мезанад, ки дар сари қудрат бимонад ва қудратро қабилаӣ ва авлодӣ кунад? Вақте мо мегуем,  ки ҳокимияти давлатиро, ҳокимияти мансуб ба миллатро ва ба мардумро бо хешу табору ақрабо, бо домоду духтарҳову ҷиянҳояш тақсим карда ва коре надорад, ки нафақахур чи руз дорад, бархе аз чоплусаконро қаҳрашон меояд ва онҳо мегуянд, ки Раҳмонов равад ҷанг мешавад ва Раҳмонов барои тоҷикҳо давлат сохта истодааст ва “ниҳодина” мекунад.  Бале,бале, дида истодаем, ки чи тавр “ниҳодина” карда истодааст.

    “Ҷигарда …ҷигар ”

Вале як нуктаи мавриди ёдоварӣ ин аст ки солҳо пеш Бобоҷон Бобохонов, Прокурори генералии собиқи Тоҷикистон маҳз бо тавсия ва ҳатто хоҳиши худи Эмомалӣ Раҳмонов писарашро прокурори Ҳисор таъйин кард. Ҳисор як ҷойи бисёр ҳам даромаднок барои мансабдорон, махсусан мақомот аст. Онҷо зуд бой мешавад. Ҳамин Файзуллои писари Бобохонов ҳам бой шуда буд. Аммо кори худоро бинед, ки ӯро турма ва тамоми молу мулкашро мусодира карданд.

Умедро ба кормандони Прокуратураи Ҳисор Қосим Раҳбар, раиси Ҳисор муаррифӣ кардааст. Баъди ҳамагӣ чанд рӯзи муаррифии Умед, Қосим Раҳбарро аз мақомаш бидуни огаҳӣ ва бидуни кадом шарҳе Эмомалӣ Раҳмонов аз кор ронд.

Сообщение «Ҷигар ҷигару дигар дигар» появились сначала на ISLOH.net.

Моҳи октябри соли гузашта дар прокуратураи шаҳри Бохтар (Қурғонтеппаи пешина) бар асоси шикояти як зан кори тафтишот оғоз шуд. Ин зан шикоят мекард, ки ӯро Азизулло Соҳибов, раиси идораи «Тоҷикматлубот»-и вилояти Хатлон дар манзили зисташ қасди таҷовуз кард ва баъде, ки зан рад кард бо корд заду маҷрӯҳ намуд. Ин ҳодиса дурусту дақиқ даҳуми октябр рух дод ва он зани 36-сола дар шумори «меҳмон»-они Азизулло қарор дошт. Албатта, ин меҳмониву меҳмондорӣ дар яке аз манозили истиқоматии Азизулло Соҳибов, баъд аз онки ба таклифи «ҳамхобагӣ» бо соҳибхона розӣ намешавад, ба вуқуъ мепайвандад. Хабаргузориҳо навиштанд, ки милисаи шаҳри Бохтар дар асоси сӯҳбат бо шоҳидони ҳодиса мавод тартиб медиҳад. Парвандаро Раёсати вилоятии милиса мегирад. Милисаи вилоят ҷиҳати тасдиқи фикри айбдоркунӣ ба прокуратураи шаҳри Бохтар месупорад. Аммо бо ҳамин кори тафтишот ба анҷом мерасад ва Азизулло Соҳибов ба ҷавобгарӣ кашида намешавад. Дар ҳоле, ки милиса дақиқан санад тартиб медиҳад, ки ин зан дар пайи ҳамлаи Азизулло Соҳибов бо силоҳи сард захмӣ шудааст. Ин зан се рӯз дар шӯъбаи реаниматсионии Бохтар бо марг даступанҷа нарм мекунад, вале шифо меёбад. Азизулло Соҳибов ба тафтишот гуфтааст, ки ин занро дар манзилаш «бори аввал» дидааст ва ин зан «худаш дар гарданаш бо корд задааст». Ҳамин тариқ ин «аллиби»-и Азизулло мавриди қабули додситонӣ қарор гирифт ва мақомот парвандаро махтума эълон карданд ва Азизулло ҳадди ақал ҷарима нашуд, куҷо расад ба сӯй қасд ба ҷони шаҳрванду ҳукм гирифтан. Аммо савол инҷо аст, ки Азизулло кист? Азизулло Соҳибови 50-сола,бародари Маҳмадзоир Соҳибов шӯи Фируза, духтари калонии Раҳмонов ва амаки Шамсулло Соҳибов-шӯи Рухшонаи Эмомалӣ, сафири Тоҷикистон дар Бритониёи Кабир, духтари дигарии Эмомалӣ Раҳмонов, яъне домодҳои Эмомалӣ Раҳмонов мебошад.

Соли гузашта, Қурбонбӣ Раҳмонова, хоҳари 64-солаи Эмомалӣ Раҳмонов ва беваи Холмуъмин Сафарзода, собиқ раиси Идораи ҳифзи ҷангали Тоҷикистон,ки дар соли 2012 дар назди масҷиди «Автовокзал»-и Душанбе дар пайи як «разбор» бар сари 350.000 доллар кушта шуда буд, бар асари ибтило ба коронавирус Қурбонбӣ аз дунё даргузашт. Се писари марҳума Қурбонбӣ, ҷиянҳои «родной»-и Эмомалӣ Раҳмонов ба шумули полковник Фахриддин Сафарзода, сардори собиқи милисаи Шаҳринав шоми 20-июл Ҷамолиддин Абдуллозода, вазири тандурустии Тоҷикистон ва Холмуҳаммад Раҳимзода, мудири Маркази тиббии назди Дастгоҳи иҷроияи президентро, барои онки ба бемор даво ва дармон бахшида натавонистанд мавриди латту кӯби шадид қарор медиҳанд, ки бар асари ин ҳамла онҳо сахт маҷрӯҳ мешаванд. Ҳодисаи латукӯб ҳамзамон бо эълони хабари марги модар аз тарафи Фахриддин, Фаррух ва Зиёдалӣ Сафаровҳо сурат мегирад. Гап дар инҷо аст, ки ба бемористони ҳукуматӣ, ки хоҳари Раҳмонов бистарӣ буд як пизишки хориҷӣ даъват мешавад ва вай тавсия медиҳад, ки усули табобат дигар шавад. Ҳамин гап боис мешавад, ки хоҳарзодаҳои Раҳмонов вазири тандурустиро барои нокифоятӣ дар муолиҷа зери мушту лагад бигиранд. Шоҳидон мегӯянд, ки вазир таваллову зорӣ мекунад, ки «накушедам, ду фарзанди касалӣ дорам». Танҳо бо дахолати Рустами Эмомалӣ онҳоро ором кардаанд, гуфтааст яке аз шоҳидони ҳодиса. Дар аввал ҳам дар вазорати тандурустӣ ва ҳам дар вазорати дохилӣ вуқуи ин ҳодисаи ғайримаъмулӣ ва боварнакарданиро тасдиқ карданд. Вале баъдан ҳама дар даҳон об гирифтанд, балки инкор намуданд ва гуфтанд, ки вазири тандурустӣ «чандин вақт аст ки дар сафари корӣ дар хориҷа қарор дорад”. Ин дар ҳолест, ки ҷоғи вазири тандурустӣ шикаставу тақрибан як моҳ «бемори атолахур» мешавад ва вай ҳатто дар нишасти матбуотиаш, ки дар рӯзи 26 июл муқаррар шуда буд, ширкат карда наметавонад. Агарчи Раёсати мубориза бо ҷароими созмонёфтаи вазорати дохилӣ (Шодӣ Ҳафиззода) тафтишот оғоз кард, аммо то кунун касе муҷозот нашуд.Чунки онҳо ҷиянҳои Эмомалӣ Раҳмонованд ва барои онҳо тамоми кор ҳатто ҷиноят мумкин  ва равост, чун аз каста ва қавми дигаранд. Оё шумо дар ягон гӯшае аз дунё шунавидаед, ки ҷияни роҳбари давлат вазири ҳукуматро зери зарбаву шаллоқ бигирад ва аммо ҳиҷ муҷозоте нашавад?

Дар бораи ҷурму ҷиноёти бародарзанҳои Эмомалӣ Раҳмонов ҳам дар расонаҳо чандин матлабу гузоришҳо ба нашр расида буданд. Шумо аз Муҳибулло Саъдуллоеви «номард бошаму зинда бошам» хабар доред ва агар хабар надошта бошед ба ёдатон танҳо аз ду маврид ҷинояти ин бародарзани Раҳмонов мегӯям. Як зани шаҳритузӣ чанд соли пеш дар як навори видеоӣ мегуфт,ки Муҳиб меояду духтари ӯро рӯирост мебараду таҷовуз мекунаду боз меоварду ба хона мемонад. Ин зан дар ин навор, мегӯяд танҳо ба хотири онки раиси ҷумҳур аз қазия огоҳ бишавад розӣ ба сабти суҳбаташ шудааст. Вай бо муроҷиат ба раисиҷумҳури Тоҷикистон Эмомалӣ Раҳмонов мегӯяд, бародарзани вай- Муҳибулло Саъдуллоев дар соли 2005 дар вақти набудани ӯ духтарашро маҷбуран аз хонааш берун бурда, ба номусаш таҷовуз кардааст. Ӯ мегӯяд, Саъдуллоев баъдан ҳам пайваста пеши духтараш меомад, вале мақомоти интизомӣ дар посух ба муроҷиатҳои вай иқрор кардаанд, ки коре бо додарарӯси президент карда наметавонанд.

Ҳодисаи дигаре, ки Муҳибулло Саъдуллоев «қаҳрамон»-и асосии он мебошад, тасарруфи ошкорои бозори «Ином»-и ин ноҳия мебошад. Муҳиб бо такя ба онки шавҳари хоҳараш раиси ҷумҳурии Тоҷикистон аст, бозори як оиларо кашида гирифт ва бадтар аз ин онҳо-зану шавҳарро, ки арзу шикоят ва даъвӣ карданд, бурду шинонд ва коре кард, ки онҳо ноилоҷ аз баҳри бозори бунёднамудаашон бигзаранд. Ошкоро асноди тақаллубӣ сохта гуфт, ки соҳибони бозор 50% бозорро ба вай инъом каранд. Аммо соҳибони бозор ин гапро рад намуданд. Муҳиб ҳам пустинро чапа пушиду бозорро комилан ғасб ва шавҳари занро маҳкум ба зиндон кард. На Раҳмонов арзи ин ду соҳиби бозорро шунавиду на «апаи Азизмоҳ»-и газетахонак. Дар дасти мо садҳо ҷиноятҳои хело вахими Муҳиб вуҷуд дорад вале танҳо ба он дуе,ки ҳама аз он огоҳанд иктифо менамоем.

Яке дигар аз наздикони Раҳмонов, ки «вес Тоҷикистонро задагӣ» ин Амриддин Нахшов, мудири корхонаи истихроҷи тиллои «Нахш» ва хоҳарзодаи ҳамсари президенти Тоҷикистон мебошад. Мақомоти милиса Нахшов ва нӯҳ ҳамроҳашро ба он муттаҳам карданд,ки нимаи дуввуми майи ду соли пеш дар маркази ноҳияи Данғара кормандони ширкати «Мину Фарм»-ро мавриди шаллоқ қарор дод. Нахшов ба он гунаҳкор дониста шуд, ки шаби 16-уми май бо чанде аз ҳамроҳонаш ба кормандони кирояи ширкати «Мину Фарм», паймонкори ширкати «Фароз», ҳамла кардааст. Дар ин ҳодиса ҳудуди даҳ кас ҷароҳат мебардорад. Дар тани  чаҳор нафари онҳо зарби корд мушоҳида шуда буд. Дар миёни осебдидагон чаҳор шаҳрванди Афғонистон низ буданд, ки барои бастани шартнома барои ҷамъоварии шираи камол ба Данғара омада будаанд.

Ҳамроҳони Нахшов барои иштирок дар занозанӣ ва расондани зарари вазнин ба саломатӣ аз 3 то 5 сол ҳукм гирифтаанд. Аммо Амриддин Нахшов бо ҷарима озод шуд. Ин Шамсулло Соҳибов, яке аз домодҳои сершумори Раҳмонов буд, ки ин ҷангу ҷангҷол то ба додгоҳ кашонида шуд ва Амриддинро маҷбур аз ҷойи пинҳоншудааш дар хонаи Ҳасан Асадуллозода, яке дигар аз бародарзанҳои Раҳмонов ба суд оварданд. Аммо бо вуҷуди ин ба ӯ танҳо ҷарима татбиқ карданду халос. Як манбаъи наздик ба ВКД ба “Ислоҳ” гуфт: Амриддин Нахшов ҳеҷ гоҳ худро таслими мақомот накарда буд ва ин, ки худаш ба ШКВД Данғара рафт ин комилан бе асос буд. Шоҳид будем ба Шоҳрух Саидов занг зад Амриддин дар он шабу рӯзи ҳодиса ва мисли вазир пурсид чӣ гап аст ҳарчи ҳарчи шунидестам дар масалаи кору бори ма? Шоҳрух гуфт ҳама хуб аст акаи Амриддин ва шумо истироҳататонро кунед корро мо ҳал мекунем. Баъд ба Душанбе омад ва дар кабинети Шоҳурух бо сиёсат фармон дод тезтар и гапу чақа ҳал кунен, ма ихели наметонм дигар. Шоҳрух гуфт акаи Амриддин ҳама ҳалаи шумо ягонҷоеда бошен набинантон тамом. Сад дар сад шоҳидам,ки ба суд ҳам нарафт ва бидуни ҳузури Амриддин додгоҳ ҳукми ҷаримаро содир намуду кор бо ҳамин тамом. Шоҳрух боз занг зада ҳамаи ҳолатро доложит кард ба Амриддин.

Тибқи маълумотҳои ба мо расида солҳои охир Амридин Нахшов,ки ҳоло як нафари хеле ҳам серпул шудааст (миллионҳо доллар) даст ба бедодгариҳои зиёд мезанад. Бахусус, баъд аз онки Рустами Эмомалӣ, раиси Душанбе таъин мешавад вай дар Душанбе руирост «безпеределӣ» мекунад. Рустам ӯро ба наздаш ҷеғ мезанад ва мегуяд: «Амридин бедодгариҳои зиёд карда истодаӣ. Инҷо шаҳр аст. Дар инҷо ин корҳоятро накун. Рав ҳаму кони тилоят кор кун, дар ҳамон территория чи хеле мехоҳӣ бигард.Дар шаҳр ин корҳоятро набинам».

Амриддин, ки сахт хашмгин шуда буд посух медиҳад, ки «Ма да Тоҷикистон гапзана фалон мекунам».Баъди ин гап дар байнашон занозанӣ сар мешавад ва Амриддин Рустамро як шапалоқ мезанад. Онҳоро халос мекунанд. Аммо ин кор як ғавғои калонро дар оила ба бор меорад ва бо дахолати Ҳасану Азизмо ва дигар тағоҳои Рустам қазияро ором мекунанд ва онҳоро боз оштӣ медоронанд.

Ҳоло саволи ахир ин аст, ки чаро ин ҳама қонуншиканӣ ва ҷиноятҳои вазнин аз ҷониби ақориби Эмомалӣ Раҳмонов рух медиҳад? Иллат ва сабаби асосӣ он аст ки онҳо ба худи Раҳмонов тақлид ва пайравӣ мекунанд. Раҳмонов худаш барои ба вуқуъ омадани ин ҳама аъмоли зишту ҷиноӣ ба онҳо улгу ва намуна аст.

Раҳмонов Талкоро гирифту даромади онро ба ҳисоби шахсии худаш гузаронд, Раҳмонов, тиҷорати чандмиллиондолларии Зайд Саидовро тасарруф карду аз они худ намуд, Раҳмонов бонкҳои Агроинвестбонк, Тоҷпромбонк ва Тоҷиксодиротбонкро бардуруӯғ муфлис хонда пулҳои онҳоро аз они худ кард, Раҳмонов Умед-88ро зиндон карду кушту тамоми пулу молу заправкаҳои ӯро гирифту аз они худ кард, Раҳмонов Мирзо Зиёро кушт, Раҳмонов Каромат Шарифовро кушт, Раҳмонов Умаралӣ Қувватовро кушт ва мусаллам аст , ки ҳама ҷурму ҷиноёти Раҳмонов дар тӯли ин сӣ солро наметавон инҷо тазаккур кард. Мо, мушт намунаи хирвор овардем. Ҳамин тавр хешу табори Раҳмонов ҳам дар тақлиду пайравӣ ба ӯ ва бо такя ба ӯ ва пуштибониву ҳимояти ӯ аз содир кардани ҳар гуна ҷурму ҷиноят ибо намеварзанд. Барои онҳо тамоми кор иҷозат ва мумкин аст.

Аз ҳамин ҷо аст,ки писари Нусратулло Абдуллоеви собиқ раиси Суди олӣ дар сари рули мошин маст нишаста одам мекушад, аммо муҷозот намешавад, писари Давлаталӣ Сайид, муовини аввали сарвазир ва аз дигар ҷиянҳои худи Раҳмонов низ мадҳушу махмури амфетамин (маводи мухаддира) мошин ронда якбора ду одам мекушад, аммо ба ҷавобгарӣ кашида намешавад. Ва,ё писари Амонулло Ҳукумов, собиқ раиси Идораи Роҳи оҳани Тоҷикистон ва аз наздикони Эмомалӣ Раҳмонов се касро кушт, ақалан ҷаримааш накардаанд. Амонулло Ҳукумов ҳамон нафаре аст ки самолёт ва летчикони русро гаравгон гирифта,писараш,ки дар зиндони Россия бо фурӯши зиёди наркотика адои муҳлат мекард иваз карда ба Тоҷикистон оварда буд.

Ва, ахиран ин ҳодисаро ҳам тазаккур бидиҳам, то худ мутмаин бишавед, ки ҳоло ин ин хонавода ва ин авлод ҳамаро задагиву кашидагианд. Писари ҳоҷӣ Амируллои Асадулло, бародарзани дигари Эмомалӣ Раҳмонов  бо мошини гаронбаҳои “Ламборҷини” шаби 7 ноябри соли гузашта дар майдони Дӯстӣ, дар муқобили бинои парлумони Тоҷикистон дар маркази шаҳри Душанбе ба як мошини “Тойота Кемри” бархӯрд. Хабарҳои расида ҳокист, ки садама бо айби писари ҳоҷӣ  Ҳоҷӣ Амируллои Асаддуло раиси собиқи шаҳри Бохтар рух дода ва вай ба гардан гирифтааст, ки мошини зарбхӯрдаро тармиму таъмир карда медиҳад. Аммо гуфта мешавад, ки писари ҳоҷӣ Амирулло дар сари фармони мошин ба ҳадде маст будааст, ки кормандони БДА-ро ҳам сахт дашном мекунад. Саволи дигар ин аст ки ин писари ҳоҷӣ Амирулло мошини “Lamborghini Urus” 250.000 –доллариро чи гуна ба даст овардааст ва чаро ҳатто барои ин ҷиноят як дирам ҳам ҷарима нашуд?

Бо тамоми масулияти имонӣ мегуям,ки дар дасти “Ислоҳ” аз ҷиноятҳои наздикони оила хело маълумотҳои зиёде расидааст. Ҳоло дигар ҷиноятҳо ва амалҳои рейдерии писару духтарони пешво бо худи додарарусону ҷиянҳои Раҳмонов як чизи муқаррари аст. Акнун писарону духтарони инҳо шурӯъ намуданд ба тохту тоз ва ҷиноят кардан. Як Исмоили набераи “Пешво” чунон ҷиноятҳои вахиму нобахшуданияш ба мо расидааст,ки намегуед,ки Тоҷикистон бошад ва ин кишвар қонун дошта бошад. Чаро ? Чунки медонанд бе ҷазо мемонанд? Чаро бе ҷазо мемонанд? Охир инҳо наберагони “Пешво” ва апаи Азизмоҳ мебошанд.

Бори дигар мегӯем, ки Раҳмонов ва ақрабои вай аз чандин сол аст ки дигар фаро ва фавқулқонун шудаанд, агарчи «давлатчоплусакон» инро намебинанду намефаҳманд, аммо воқеият зиндагии ҳамарӯза дар кишвар ҳокӣ аз он аст ки дигар инони ихтиёру қарорро комилан аз даст додаанд ва ҳиҷ ниҳоду мақомоте наметавонад, пишаки онҳоро пишт бигӯяд…

“ Ислоҳ” дар мавриди ҷиноятҳои оилаи “пешво” таҳқиқотҳои худро мӯйшикофона идома медиҳад ва ончи таҳқиқ шуд ҳатман тақдими шумо азизон менамояд.

Сообщение Ҷиноятҳои наздикони “Пешво” ва Азизмо чаро бе ҷазо мемонанд? появились сначала на ISLOH.net.